Fotball

Så kjekt at du vil vera med i Samnanger Fotball! Dette blir gøy!

Her finn du oversikt over treningstider, treningsavgifter og kan melde deg inn/ut på fotball. Meir info om kampoppsett finn du på fotball.no.

Lagleiar/trenar gir beskjed når første trening blir og kallar inn via Spond. Det er viktig at alle svarar «Deltek» eller «Avslår» så snart som mogleg.

Føresette: Ønskjer du å vera med under trening, oppmodar me til å halda litt avstand og ikkje samlast rundt bana, for å unngå uro. Oppmoda barnet til å vera med på heile treninga. Hugs drikkeflaske med vatn, og gjer toalettbesøk unna før trening.

For å spela fotball må ein ha på leggbeskyttarar og fotballsko. Har du ikkje leggbeskyttarar, får du heller ikkje spela eller trena.

Samnanger Fotball jobbar etter retningslinjene i Fair Play og ønskjer at alle skal ha gode opplevingar på fotballbana.

Fotballgruppa har avtale med Umbro og Torshov Sport. Alle får utdelt drakt når dei byrjar. Drakta skal leverast rein og vaska tilbake til lagleiar/materialforvaltar når ho er for lita eller du sluttar.

Fotballgruppa er drifta på dugnad av styremedlemmer, trenarar, lagleiarar og føresette. Me er avhengige av dugnadsinnsats når me har arrangement.

Ny i fotballen? Les om 3'ar-fotball – der ein startar.

Lykke til! Helsing styret i Samnanger Fotball.

Utetrening måndag, onsdag og søndag. Innetrening 2025/2026 i gymsal – sjå oversiktene under.

Treningsavgifta er den viktigaste inntektskjelda til fotballen. Utan henne hadde det ikkje vore mogleg å halda oppe eit godt fotballtilbod for barn og ungdom i Samnanger. Inntektene dekkjer mellom anna:

• drakter, ballar, mål, vestar, kjegler, medisinsk utstyr o.l.
• dommarutgifter
• seriepåmelding og forsikring av spelarar
• deltaking i cupar

Avgiftene vert normalt vedtekne på årsmøtet i gruppa, og innvendingar mot nivået må leggjast fram der. Det vert sendt éin faktura per spelar per sesong i mars via e-post. Har du ikkje fått faktura? Logg inn og sjå henne i Min idrett. Betalingsfristen er 15 dagar frå fakturadato.

Satsar for sesongen:

• 6 år – 650 kr
• 7–9 år – 700 kr
• 10–12 år – 800 kr
• 13–18 år – 1100 kr
• A-lag herrar – 2500 kr

Innbetalte treningsavgifter vert ikkje refunderte om spelaren sluttar eller melder overgang til ein annan klubb i løpet av sesongen.

Fritak og rabattar:

• 3. barn får 50 % rabatt – berre det eldste barnet får rabatt
• Barn av styremedlemmer i SIL Fotball får 50 % reduksjon
• Barn av trenarane til laga og junior hovudtrenarar får 50 % reduksjon – gjeld maks 2 trenarar per lag
• Barn av lagleiarane får 50 % reduksjon – gjeld 1 lagleiar per lag
• A-lag får ikkje rabatt
• Rabattane kan ikkje kombinerast

Kva skjer om treningsavgifta ikkje vert betalt?

• Spelaren er ikkje forsikra
• Spelaren er ikkje spelarberettiga i kampar for laget sitt
• Spelaren vert sett som inaktiv i FIKS
• Spelaren kan ikkje melda overgang til ein annan klubb før treningsavgifta er betalt

Problem med å betala i tide? Får du problem med å betala fakturaen innan forfall, er det viktig at du seier ifrå til kasserar/fotballstyret. Vi er løysingsorienterte og prøver å hjelpa dersom fakturaen kjem på eit ugunstig tidspunkt. Send e-post, primært til kasserer.samnangerfotball@outlook.com. Høyrer vi ikkje noko, ventar vi at fakturaen vert betalt ved forfall.

NB: NIF pålegg oss å senda faktura via Klubbadmin, og då mistar vi høvet til søskenrabatt. Prisane er difor justerte. Samanlikna med andre klubbar ligg vi framleis lågt på treningsavgifter.

I tillegg til aktivitetskontingenten til fotballgruppa må alle spelarar betala 150 kr i medlemsavgift til SIL hovudlaget. Nokon synest kanskje det er rart å betala to fakturaer for å spela fotball, men dette er ikkje noko SIL har funne på: det er nedfelt i lovene til Norges Idrettsforbund – alle utøvarar må vera medlem av eit hovudlag for å utøva ein særidrett.

Styret i Samnanger fotballgruppe · Lagleiarar og trenarar for sesongen 2026

Trenaren sine oppgåver

1. Ansvar for å gjennomføra treningsøktene. Leiar laget under kamp.
2. Trenaren er ofte den viktigaste vaksenpersonen for spelaren i fotballmiljøet. Difor er det viktig å tenkja over kva ein gjer og seier, og vera eit godt føredøme.
3. Alle spelarar er like mykje verdt. Gjev oppmuntring til alle i medgang og motgang, og legg til rette for eit trygt miljø med aktivitetar spelarane meistrar: Trygghet + trivsel = meistring!
4. Alle jobbar etter Fair Play-reglane. Dei minste laga (6–12 år) skal få spela nokolunde likt – unngå å favorisera.
5. Sjå på dommaren som ein rettleiar og gjer dommaren god. Respekter avgjerdene, ta imot og takk dommaren etter kvar kamp, og ver eit føredøme for borna i måten du oppfører deg mot dommaren på.
6. Hugs at det er borna som spelar fotball – ikkje du. Tap og vinn med same sinn. Vis respekt for andre. Ikkje røyk, bann eller ver aggressiv på sidelinja.
7. Dispensasjon: Har laget dispensasjon for ein spelar, har trenaren ansvar for å ha henne med på kvar kamp og visa henne til motstandar og dommar før kampstart.
8. Har du nøkkel til Hagabotnane, er du personleg ansvarleg for henne. Nøkkelen skal leverast inn når du sluttar.
9. Trenarane er òg bindeledd mellom foreldre, lagleiar og styret.
10. Trenaren tek initiativ til Fair Play-møte før og etter kamp med dommar og motstandarlaget.

Lagleiaren sine oppgåver

1. Gjev informasjon til alle spelarar og foreldre, og er bindeledd mellom styret og laget. Opprettar Spond-gruppe for laget.
2. Seier ifrå til materialforvaltaren om utstyr laget treng.
3. Melder laget på cupar. Send faktura til kasserar på e-post for betaling. Det vert dekt inntil 3500 kr for lag med meir enn 10 spelarar og 2500 kr for lag med færre enn 10. Ein kan søkja styret om ekstra midlar ved overnattingscupar.
4. Set opp Fair Play-vakt til kvar heimekamp.
5. Set opp kioskvakter på heimekampar.
6. Er kontaktperson mellom foreldra og fotballgruppa/trenarane.
7. Syt for at alle får oversikt over kampane sine.
8. Dommaransvarleg ordnar dommar til kampane, men lagleiaren betaler dommaren. Dommarrekninga ligg i klubbrommet – sei ifrå til kasserar når det byrjar å bli tomt. Rekninga vert send til kasserar på e-post.
9. Send SMS eller ta kontakt med motstandarlaget dagen før kamp, slik at dei har hugsa kampen og stiller. Minn gjerne om at vi har open kiosk.
10. Er det problem med å stilla lag til kamp, må lagleiaren flytta kampen: avtal ny tid med motstandarlaget, meld frå til kretsen og til oppsett dommar, og sjekk at bana er ledig på den nye tida.

Dommarar i fotballgruppa

I styret sit det ein dommaransvarleg som har ansvar for at det vert sett opp dommar til alle heimekampar. Dette vert lagt inn i Google-kalenderen til Samnanger Fotball. Vert kampar flytta, er det svært viktig å melda frå til FIKS-ansvarleg, som legg kampane inn i kalenderen, og til oppsett dommar.

I tillegg ber vi lagleiaren melda frå til dommaren dagen før kamp, som ei påminning. Det er viktig å hjelpa kvarandre å hugsa – då går det endå betre!

Vi ønskjer at alle lagleiarar og trenarar behandlar dommaren fint og gjev hjelp og støtte under kampane. Nokre av dei er svært unge, og det er ikkje alltid enkelt å dømma kampar. Vi treng dommarane, og dei må trivast på fotballbana for å halda fram.

Vi utdannar nye klubbdommarar kvart år, og det er viktig å ta vare på alle som har lyst til å vera dommar framover.

Fotballgruppa har avtale med Umbro og Torshov Sport, og vi har fått eiga nettside hos Torshov.

Alle får utdelt drakt når dei byrjar. Drakta skal takast vare på og leverast tilbake når ho er for lita eller du sluttar – rein og vaska – til lagleiar eller materialforvaltar.

Du får genser frå fotballgruppa når du startar, og det året du fyller 10 og 13 år. Skal laget reisa på internasjonale cupar, kan alle få genser mot ein eigendel på 100 kr.

Treng de ekstra keeperhanskar eller noko anna som manglar, ta kontakt med materialforvaltaren. Vi har gode rabattar hos Torshov Sport.

Fotballgruppa brukar Spond til all kommunikasjon. Der er det lett å senda ut innkalling til treningar, kampar og turneringar. Lurer du på noko anna, ta kontakt med ein av oss i styret, så hjelper vi deg.

Slik redigerer du personinfo i Spond: All informasjon som vert lagt inn i Spond må vera rett. Er det ikkje gjort, ordnar du det slik:

1. trykk på «Medlemmer»
2. trykk så på «…»
3. og deretter «Rediger»

Her må du leggja inn fornamn og etternamn, minst éin føresett (med e-post og/eller mobilnummer), fødselsdato og adresse. Når dette er gjort éin gong på alle, går resten som ein leik.

Du kan òg visa nye medlemmer til nettsida vår og «meld deg inn i fotballen». Då kjem skjemaet opp automatisk, og dei vert registrerte heilt rett frå starten.

• Hent nøkkel på Best på Bjørkheim. Du må kvittera for at du har henta han.
• Ver i kiosken minst eit kvarter før kampstart, så vaflar og kaffi er i gang.
• Sprit hendene når du kjem.
• Set ut «KIOSK OPEN»-skiltet på kortsida av klubbhuset, slik at det synest frå begge banene.
• Heng ut is-flagg framfor dei utsalslukene som er opne.
• Lås opp toalettet på baksida av huset ved grusbana.
• Vekslepengar ligg i skuffen i pengeskrinet.
• Lag kaffi – eigen kaffikanne. Kok vatn – eiga kanne.
• På salsskjemaet treng ein no berre summera kontantsalet. Dagens omsetnad og salsskjemaet vert lagde i ein pose i den kvite postkassen inne på veggen i kiosken. Hugs å leggja att 400 kr i vekslepengar i pengeskrinet, og å signera med dato og laget du representerer. Er det ikkje nok mynt til vekslepengar, sei ifrå til kioskansvarleg.
• Desinfiser og vask kontaktflater og utstyr på kjøkkenet.
• Kost golvet og vask det med engangsmopp.
• Har de tid til overs, er det fint om de fyller på varer, vaskar der de ser det trengst og ryddar litt.
• NB: sjekk dato på brusen – eldst ytst.
• Dra ut støpselet til mikro, vasskokar, kokeplate og vaffeljern.
• Bosset vert kasta i søppeldunken bak den store gule garasjen ved enden av banene. IKKJE kast boss i den vesle boden i enden av klubbhuset.
• Hugs å sjekka og tømma bosspanna utanfor kiosken og på framsida.
• Is-flagga vert tekne inn etter kamp, både på framsida og utanfor kiosken.
• Lever nøkkelen tilbake til Bjørkheim, og kvitter for han.

Lagleiarar og trenarar får gratis kaffi når det er kamp.

Viktig: Kan du ikkje ta den oppsette vakta, må du sjølv ordna byte. Takk for at de stiller opp! Er det spørsmål eller varemangel, ta kontakt med kioskansvarleg.

Kven er vi til for?

Samnanger IL Fotballgruppa skal gje eit positivt aktivitetstilbod for alle gutar og jenter over 6 år i Samnanger som ønskjer å spela fotball. Gruppa vil òg jobba aktivt for kunstgrasbane der det i dag er grusbane.

Fotballgruppa skal:

• primært ha søkjelys på breiddeidretten og sørgja for at jenter og gutar får det same tilbodet
• òg leggja til rette for sportsleg suksess og utvikling for junior- og seniorspelarar i eigen klubb, gjerne i samarbeid med andre klubbar

Topping av lag skal ikkje prioriterast i barnefotballen i Samnanger, det vil seia opp til 12 år. Over 12 år kan topping skje, men trenaren bør samstundes ha søkjelys på at alle får vera aktive.

Kva skal vi gjera for medlemmene, og kvifor?

• Førebyggjande arbeid
• Gje eit fritidstilbod
• Sportsleg utvikling
• Skapa god klubbkjensle og samhøyrsle

Fotballgruppa har eit ansvar for å ta vare på dei som ønskjer å spela fotball i Samnanger. Det gjer vi ved å gje medlemmene eit godt sportsleg og sosialt tilbod med engasjerte trenarar og lagleiarar, tilpassa dei ulike årsklassane. Gjennom dette arbeidet skal vi skapa godt kameratskap og eit positivt miljø. Miljøet som vert bygd, skal verka førebyggjande for ungdom, særleg når det gjeld doping, alkohol, tobakk, mobbing, rasisme og vald. Det skal òg leggjast til rette for andre tilbod som held ungdomane lengst mogleg i klubben, til dømes ungdomsleirskule, dommarutdanning og trenarutdanning.

Framgangsfaktorar og hovudutfordringar

Samhald og klubbkjensle: Fotballgruppa skal halda fram arbeidet med å byggja eit godt klubbmiljø. Medlemmene våre vert oppmoda til å koma med innspel som kan bidra til positiv utvikling av klubbmiljøet, slik at ingen vert mobba, kjenner seg utestengde eller ikkje velkomne. Gruppa skal arbeida for å laga retningslinjer for handtering av mobbing, rasisme og vald. Tillitsvalde, trenarar og lagleiarar vert oppmoda til å delta på fellestiltak i eigen klubb og i regi av krets og forbund.

Anlegg: Talet på lag i gruppa har auka kvart år, og med det følgjer krav til treningstider og gode anlegg. Fotballgruppa skal arbeida aktivt saman med hovudstyret i idrettslaget for å leggja til rette for fleire og betre anlegg, mellom anna fleirbrukshall. Gruppa skal òg arbeida for større forståing blant laga for dei disposisjonane som må liggja til grunn for bruk av eksisterande anlegg.

Mål

Sportslege mål:

• Fotballgruppa skal ha hovudfokus på breiddefotball
• Fotballgruppa skal vera aktiv i Fair Play-satsinga til kretsen
• Sjå elles sportsplanen

Andre mål:

• Betra den interne kommunikasjonen i fotballgruppa
• Vidareutvikla ein god administrasjon av fotballgruppa
• Skapa gode handlingar i alle ledd i gruppa
• Ta initiativ til fotballskule for dei minste

Aktivitetar og framdrift

Organisasjon

Fotballgruppa sitt styre er organisert slik:

Støtt lokalfotballen samstundes som du profilerer bedrifta di gjennom ein lokal aktør. Me har plass til fleire samarbeidspartnarar – bli med på laget! Ta kontakt med leiar i fotballgruppa Svein Tore Drevsjø: svein.drevsjo@gmail.com / 902 47 929.