KM mellomdistanse i Endelausmarka

Fem Samnanger-løparar tok turen til Bjørnafjorden for å kjempa om KM-medaljar og mot terrenget i «Endelausmarka». Me var førebudde på tungt og knotete terreng, men det viste seg at det faktisk gjekk an å springa.

Fire av oss sprang same løype. Den som bomma mest, kom best ut av det, og det seier kanskje noko om status i kretsen. Ida Johanne mista både hovudet og håpet på veg til sjuande post der ho brukte 15 minuttar (12 minuttar lengre enn Per Arne på same strekk), men fekk likevel med seg ein bronsemedalje i klasse D19 med tida 46.20.

Dei tre andre var alle soleklart framfor, men det er små marginar når ein har kome opp i den desidert største klassen i kretsen: H50. Per Arne – med eit dårleg kne – vart nummer fire med tida 28.59. Dag Terje – med støle leggar – vart nummer elleve med tida 35.33. Og Rune – som verken hadde bommar eller slitne kroppsdelar å klaga på – vart nummer 18 med tida 41.24.

Borgel sprang sitt første o-løp åleine, og kom fint gjennom C-løypa. Han fekk heldigvis lagt inn ein liten «bom», slik at han fekk erfara korleis det er å vera med i sytekoret etter målgang. Neste gong vil han prøva seg på noko litt lengre og litt vanskelegare.

Takk til TIF Viking for eit fint arrangement! Resultat og GPS-spor ligg i Eventor. Ingen frå Samnanger deltok på KM langdistanse søndag.

(Neste lokale løp er onsdag 3. september i Hagabotnane. 28. september er det Samnangermeisterskap på Kvamskogen. Her vert det også premieutdeling for sesongen. 3. og 4. oktober inviterer HOK til sesongavslutning for kretsen, med nattløp fredag og stafett laurdag. Meir info her)