Kompisstafett for femtiande gong

På laurdag vart den tradisjonsrike Kompisstafetten arrangert for femtiande gong. Rundt hundre løparar frå kretsen hadde teke turen til Totræna denne siste augustdagen – som faktisk baud på ein del sol, sjølv om myrane vitna om ein elles våt sommar.

Kompisstafetten er det eldste orienteringsløpet i Hordaland. Første Kompis gjekk i Hildershaugen ved Fitjavatnet 19. mai 1973. Idéen var Bjarne Hauge sin, og er bygd på stikkordet «rekruttering»: For å stilla lag treng du utøvarar på alle nivå og aldrar. Den gongen var det ikkje veg til Fitjavatnet, så parkering var på Bjørkheim. Så var det (for alle!) å gå vegen opp i Nordvik og deretter stien opp til Fitjavatnet, ein god tur på 5-6 kilometer og vel 300 meter stiging. Så sprang alle Kompis, og rusla same vegen ned igjen.  

Fullt så strabasiøs var ikkje årets utgåve, men løypeleggjar – som i år som for femti år sidan var Bjarne – sørgde for at løparane fekk brynt seg både fysisk og o-teknisk. Av dei sytten laga på startstreken, var to frå Samnanger. Torvald og Trygve Oma Høysæter gjorde begge gode førsteetappar i nybyrjarløypa. På andre etappe passerte Martin Holdhus like godt heile feltet, og sprang dermed Høysæter-familielaget opp i tet. Etter fem etappar hamna familielaget på ein god fjerdeplass, bak eitt Fana-lag og to Varegg-lag, medan det andre Samnanger-laget sprang inn til niande plass. Resultat og løyper finn du på Eventor.

Takk til arrangørar og løparar for ein kjekk dag med venskapleg kappestrid i skogen!